PROFIL ANAK MALUKU CINTA ORANG SUDARA

 

 Jang basudara batanya dimana profil Anak Maluku cinta Orang Sudara, tetapi yang harus basudara musti tanya dalam hati basudara adalah mangapa…..??? sampai anak Maluku Cinta orang Sudara biking blog deng akang pung tema”Free software, Free Tutorial & mengenal budaya Maluku”. Deng semangat orang basudara Salam-Sarani Maluku dalam bingkai Siwalima Sebagai FALSAFAH hidup anak-anak Alif’uru maka beta mo ajak Jujaro deng Mungare samua mari deng katong pung semboyan “Lawamena Haulala” Maju terus Pantang Menyerah mari katong samua satu suara voor dukung akang pengembangan Komputer dan Internet di tanah Datuk-datuk ini.

 

Katorang jang hanya diam lalu baharap nanti kong ada Universitas komputer deng internet yang murah akang hadir di katong pung tanah Siwalima ini kalau katorang sandiri sebagai anak-anak Alif’uru sandiri seng biking satu gebrakan voor Pemerintah Pusat deng katong pung bapa-bapa di pemerintahan daerah. Beta jo su tau kalo budaya pamalas deng panakotang akang ada di katong pung Jujaro mungare Maluku ni..!!!. Dorang pemerintah pusat musti harus tau diri kalau Osorang su ambil katorang pung hasil kekayaan alam, Kamorang musti harus perhatikan Masa depan anak-anak Maluku yang baru saja pulih dari konflik agama yang seng tau ujang pangkalnya. Kamorang pemerintah pusat harus bisa melihat katorang pung permasalahan, jang hanya pembangunan ditujukan di indonesia Barat saja lalu katorang ditimur ni…!!! Seng diperhatikan dari kesejahteraan, Pendidikan, Fasilitas, dan hak ulayat dari orang maluku sendiri sebagai Bangsa yang bermartabat.  

 

Blog yang beta buat ini merupakan icon kecil bagi katong pung kebangkitan Perkembangan IT di Maluku. Beta mau ulang lai ni..!!!! mari katorang biking satu gebrakan deng cara katorang harus mendesak pemerintah pusat deng pemerintah daerah agar dorang menghadirkan salah satu universitas komputer di Negeri Siwalima ini, supaya katorang pung basudara yang mau kuliah komputer jang dorang lari ka luar daerah lai. Beta biking samua ini voor katorang anak-anak Alif’uru pung masa depan yang lebe bai lai, umpama saja kalau katorang samua orang Maluku su kaya dan makmur. Maka beta rasa katorang pung orang totua seng kasih kuliah dorang punya ana-ana di luar daerah tapi sampe ke Harvard University pun dorang bisa kasih kuliah dorang punya ana-ana kapa…!!!. Beta rasa itu mangkali itu Cuma mimpi saja, tapi beta yakin kalau katorang bisa bekerja keras voor pengembangan teknologi informasi di daerah ini beta yakin samua mimpi-mimpi itu akan pasti terwujud.  

 

 

 

Mimpi Anak Maluku Cinta Orang Sudara

Basudara pernah nonton iklan ditelevisi tentang Internet masuk desa, itu adalah salah satu tabaos yang Telkom lakukan pengembangan Komputer dan Internet di desa-desa. Dalam ilustrasi iklan itu kan ada ana kacil gamang voor tau apa itu internet, bagimana pake akang supaya dia bisa liat David Backam meski dia tinggal di desa. Dalam dunia internet seng ada batasan antar negara dalam katorang akses satu informasi, katorang bisa tau satu kejadian di amrik deng capat tanpa harus nonton televisi deng baca koran, bisa bacerita deng katong pung tamang secara langsung (Chatting), bisa telepon deng tamang langsung lia dia pung muka (Internet phone), bisa akses informasi apa saja asal pake kata kunci yang tepat (Browsing), dll. Itu adalah kelebihan dari katong pung Bapa yang dia pung nama internet. Tapi yang pasti tapi yang pasti samua kelebihan itu bisa basudara rasa akang kalo katorang pung bapa-bapa di pemerintah daerah ini punya komitmen yang kuat deng juga ada komitmen yang jelas dari katorang pung generasi muda Maluku voor bisa menikmati internet supaya katorang pung basudara di kampong-kampong bisa merasakan kecanggihan Teknologi informasi. Beta rasa basudara samua punya mimpi, tapi yang pasti Anak Maluku Cinta Orang Sudara punya mimpi yang sangat bagus yaitu seandainya kalau seantero maluku ini dari kota sampe ka kampong-kampong su ada komputer yang dilengkapi deng internet, maka sebagai anak Maluku beta sangat bahagia dan bangga sakali karena mimpi itu bisa menjadi kenyataan ditanah datuk-datuk ini, itu kan Cuma beta mimpi tapi beta yakin satu saat modernitas generasi maluku akan terwujud deng akang pung semboyang ’Masyarakat maluku dengan pengetahuan akan komputer dan internet”

 

Contact us via e-mail
Jika basudara ingin melakukan kontak deng beta silahkan kirim E-mail basudara ke:dolfis_pelor81@yahoo.co.id